Вакыт бара. Язучылар, шагыйрьләр үзләренең берсеннән-берсе кызыклы мавыктыргыч әсәрләрен, яңа китапларын язып, безне, укучыларын сөендереп торалар.
Бүген Г.Тукай исемендәге үзәк китапханәдә Түбән Кама шәһәрендә яшәп иҗат итүче шагыйрьләр, “Кама таңнары” әдәби берләшмәсе әгъзалары Фәнүзә Сабированың “Кайтып килик яшьлеккә” һәм Мөнҗия Хәлимованың “Күңелгә сагыш тулса” китапларында басылган шигырьләрен укып, әдәби аланда ял иттек, үзебезне кызыксындырган сорауларга җавап ишеттек.
Шәһәребезнең агросәнәгать көллияте студентлары да буш кул белән килмәгән. Якынлашып килүче Әниләр көне уңаеннан барлык аналарга багышлап шигырь сөйләделәр һәм музыкаль сәлам юлладылар. Соңыннан әниләр турындагы мәкаль-әйтемнәрне искә төшердек.